اسلام آباد۔17ستمبر (اے پی پی) سول جج جوڈیشل مجسٹریٹ احمد شہزاد گوندل اے پی پی میگا کرپشن کیس اچ گرفتار 7 ملزماں کوں 3 ݙینھ دے جسمانی ریمانڈ تے ایف آئی اے دے حوالے کرݙتا۔ وفاقی تحقیقاتی ادارہ (ایف آئی اے) ملزم محمد غواث، عمران منیر، اظہر فاروق، طاہر گھمن، خرم شہزاد، ادریس چوہدری اتے ساجد علی وڑائچ کوں عدالت پیش کر تے موقف اختیار کیتے جو ملزماں توں ریکوری اتے ریکارڈ سودھے مقدمے دی تہہ تئیں پُڄݨ کیتے مزید تفتیش دی لوڑھ اے ایں سانڳے ملزماں کوں 14 ݙینھ دے جسمانی ریمانڈ تے ایف آئی اے دے حوالے کیتا ونڄے، سݨوائی اچ ملزماں دے وکلا جسمانی ریمانڈ دی مخالفت کیتی۔ قومی خبر رساں ادارہ اے پی پی دی طرفوں حسنین حیدر تھہیم ایڈووکیٹ، خرم بٹ اتے روحیل اصغر ایڈووکیٹ عدالت پیش تھئے. روحیل اصغر ایڈووکیٹ موقف اختیار کیتا جو گرفتار ملزم ٻئے شریک ملزماں دے نال ملوث ہن، انہاں نقلی ووچرز بݨائے جیں دی تحقیقات ضروری اے اتے متعلقہ ملزماں وی فیدے ڳھدن ، انہاں دا ریمانڈ ݙتا ونڄے۔ انہاں عدالت کوں ݙسایا جو اے معاملہ پبلک اکاؤنٹ کمیٹی اچ وی پیش کیتا ڳیا ہئی جیں دے بعد ایف آئی آر تھئی اے۔ مقدمے دے تفتیشی افسر محمد جنید عدالت کوں ݙسایا جو اے جی پی آر توں ریکارڈ ݙتا نی ویندا پیا، عدالت متعلقہ افسراں کوں احکام جاری کرے۔ تفتیشی افسر ݙسایا جو سیلری کریڈٹ شیٹس دا ریکارڈ اتے ملزماں توں ریکوری کرݨی اے ایں سانڳے ملزماں دے جسمانی ریمانڈ دی استدعا منظور کیتی ونڄے۔ فاضل جج احمد شہزاد گوندل دے پچھݨ تے مقدمے دے تفتیشی محمد جنید ݙسایا جو ملزماں دے خلاف 38 کروڑ روپے دی کرپشن دا الزام اے، ملزماں دے اکاؤنٹس اچ 17 کروڑ اتے 21 کروڑ روپے منتقل تھئن جنہاں دی چھان بین کیتے ملزماں کوں مزید تحویل اچ رکھݨ ضروری اے، جیں تے عدالت ملزماں کوں 3 ݙینھ دے جسمانی ریمانڈ تے ایف آئی اے دے حوالے کر ݙتا۔ واضح رہے جو ایف آئی اے قومی خبر رساں ادارہ اے پی پی اچ کرپشن دے الزام اچ 16 ملزماں دے خلاف مقدمہ درج کرتے کاروائی دا آغاز کیتا ہئی۔ اے ڳالھ منݨ آلی اے جو گزریل ݙینھ سپیشل جج سنٹرل ہمایوں دلاور 13 ملزماں دی درخواست ضمانت قبل از گرفتاری خارج کریندے ملزماں کوں گرفتار کرݨ دا حکم ݙتا ہئی۔ ایف آئی اے 7 ملزماں کوں احاطہ عدالت توں گرفتار کرڳھدا جݙاں جو ٻئے ملزم فرار تھیوݨ اچ کامیاب تھی ڳئے۔
.jpg)
