کراچی۔12ستمبر (اے پی پی) پاک بحریہ دی طرفوں پنجاب اتے سندھ دے چھل متاثرہ علاقیں اچ ریسکیو آپریشن جاری ہن۔ چھل دی اوکھی صورتحال کوں ݙیکھدے پاک بحریہ دی ایمرجنسی ریسپانس ٹیم کوں جلال پور، ملتان (پنجاب) اچ تعینات کر ݙتا ڳئے جݙاں جو سندھ دے مختلف علاقیں جنہاں وچ کشمور، گھوٹکی، سکھر اتے شکارپور شامل ہن، اچ پہلے توں موجود ٹیماں امدادی سرگرمیاں اچ مصروف ہن۔ ترجمان پاک بحریہ موجب ایمرجنسی ریسپانس ٹیماں ہوور کرافٹ، ریسکیو بوٹس اتے ماہر غوطہ خور ٹیماں نال لیس ہن تاں جو پاݨی دے تلے آوݨ آلے علاقیں تئیں وقتی رسائی حاصل کر تے ریسکیو اتے امدادی کاروائیاں اچ مدد ݙتی ونڄ سڳے۔ گزریل 24 گھنٹے دے دوران 478 چھل زدہ لوک جنہاں وچ تریمتاں اتے نیاݨے وی شامل ہن، کوں مختلف متاثرہ علاقیں توں حفاظت نال کݙھ تے محفوظ جہیں اُتے منتقل کیتا ڳئے جیں دے بعد سندھ اچ ہݨ تئیں ریسکیو کیتے ڳئے لوکاں دی کل تعداد 6,860 تھی ڳئی اے۔ ایں دے علاوہ متاثرہ آبادی کوں مفت طبی سہولتاں اتے ضروری دوائیاں ݙیوݨ جاری اے تاں جو ایں قدرتی آفت اچ وقتی طبی امداد کوں یقینی بݨایا ونڄ سڳے۔ گڈو اتے سکھر بیراج دے مقام اُتے پاݨی دی سطح اچ مسلسل ودھارے دی وجہ توں پاک بحریہ ہائی الرٹ اے اتے سول انتظامیہ دے نال رل تے صورتحال اُتے گھاٹی نظر رکھی ہوئی اے۔ پاک بحریہ ایں ہنگامی صورتحال اچ قوم دے مونڈھے نال مونڈھا لا تے کھڑی اے اتے متاثرین دی پوری بحالی تئیں ہر ممکن مدد کرݨ کیتے پرعزم ہے۔
.jpg)
