اسلام آباد– 04 – اپريل (اي پي پي) وزيراعظم محمد شهباز شريف چيو آهي ته ججز جي خط تي سپريم ڪورٽ پاڻمرادو ڪارروائي ڪري رهي آهي، خطن ۾ ملندڙ مشڪوڪ پائوڊر جي معاملي جي جاچ جاري آهي، ان معاملي تي سياست نه ٿيڻ گهرجي، حڪومت پوري ذميواري سان جاچ ڪرائيندي، معاشي ترقي، غربت ۽ بيروزگاري ۾ گهٽتائي آڻڻ جي لاءِ ڏينهن رات ڪم ڪرڻو پوندو، آءِ ايم ايف سان هلندڙ مهيني اسٽينڊ بائي معاهدي جي 1.1 ارب ڊالر جي آخري قسط ملي ويندي، معاشي استحڪام جي لاءِ آءِ ايم ايف جو هڪ ٻيو پروگرام ضروري آهي، ايف بي آر جي ڊيجيٽائيزيشن جي لاءِ ڪنسلٽنٽس هلندڙ مهيني مقرر ڪيا ويندا، پي آءِ اي جي نجڪاري شيڊيول موجب ٿيندي، چيني انجنيئرز ۽ ڪارڪنن جي سيڪيورٽي کي فول پروف بڻايو ويندو. اهڙن خيالن جو اظهار هن پنهنجي صدارت ۾ وفاقي ڪابينا جي اجلاس ۾ ڳالهائيندي ڪيو. وزيراعظم چيو ته وفاقي ڪابينا جي گذريل اجلاس ۾ سپريم ڪورٽ جي چيف جسٽس سان ملاقات جي روشني ۾ انڪوائري ڪميشن جي منظوري ڏني وئي. اڳوڻي چيف جسٽس تصدق جيلاني جي مشاورت ۽ رضامندي سان ان انڪوائري ڪميشن جو نوٽيفڪيشن جاري ڪيو ويو پر بعد ۾ جسٽس تصدق حسين جيلاني ذميواري ادا ڪرڻ کان معذرت ڪري ورتي جنهن کانپوءِ سپريم ڪورٽ ان معاملي جو پاڻمرادو نوٽيس ورتو ۽ هاڻي اهو اعليٰ عدالت ۾ ٻڌڻي هيٺ آهي. اسان پنهنجي ذميواري پوري ڪري ڇڏي هئي. وزيراعظم چيو ته مشڪوڪ پائوڊر ججز کي موڪلڻ جو معاملو پڻ سامهون آيو آهي. ان معاملي تي سياست نه ٿيڻ گهرجي ۽ اسان کي پنهنجي پوري ذميواري جو مظاهرو ڪرڻ گهرجي. اعليٰ عدليه پاڻ ان معاملي جي جاچ ڪري رهي آهي. حڪومت ان معاملي ۾ مڪمل جاچ ڪرائيندي ته جيئن سموريون حقيقتون سامهون اچي سگهن. وزيراعظم چيو ته ناڻي واري وزارت، پيٽروليم واري وزارت، توانائي واري وزارت، زراعت ۽ آءِ ٽي وارين وزارتن سميت مختلف وزارتن جو تفصيلي اجلاس ٿيو آهي. خصوصي سيڙپڪاري ڪائونسل جو هڪ اهم ڪردار رهيو. ان تفصيلي اجلاس کانپوءِ اهو فيصلو ڪيو ويو آهي ته هاڻي انهن وزارتن جي ڪارڪردگي جو تفصيلي جائزو ورتو ويندو ته جيئن جيڪي انهن کي مشڪلاتون درپيش آهن، انهن کي حل ڪري سگهجي ۽ معيشت پنهنجي پيرن تي بيهي. وزيراعظم چيو ته مهانگائي ۾ ترتيبوار گهٽتائي ٿي رهي آهي. غربت، مهانگائي ۽ بيروزگاري ۾ گهٽتائي جي لاءِ ڏينهن رات ڪم ڪرڻ جي ضرورت آهي. وزيراعظم چيو ته اميد آهي ته آءِ ايم ايف سان هلندڙ مهيني اسٽينڊ بائي معاهدي جي 1.1 ارب ڊالر جي آخري قسط ملي ويندي. ناڻي وارو وزير پنهنجي ٽيم ساان گڏ آمريڪا جو دورو ڪرڻ وڃي رهيو آهي جتي ان جون نئين پروگرام جي لاءِ آءِ ايم ايف عملدارن سان ملاقاتون ٿينديون. آءِ ايم ايف جو هڪ ٻيو نئون پروگرام ضروري آهي جنهن سان معيشت ۾ استحڪام ايندو ۽ عالمي ادارن جو اعتماد بحال ٿيندو ۽ ملڪ ۾ ترقي ۽ خوشحالي جي لاءِ اسان اعتماد سان ڪم ڪري سگهنداسين. آءِ ايم ايف جون شرطون ايتريون آسان ته نه هونديون پر اسان جي اها سوچ ۽ منصوبو آهي ته غريب ماڻهو ۽ اڳ کان ٽيڪس ڏيندڙن تي بار گهٽ کان گهٽ پوي ۽ اهو بار انهن تي وڌو وڃي جيڪي اهو بار کڻي سگهن ٿا. حڪومت غربت ۽ بيروزگاري جي خاتمي لاءِ ٺوس قدم کڻي رهي آهي. وزيراعظم چيو ته ايف بي آر جي ڊيجيٽلائيزيشن تي تيزي سان ڪم ٿي رهيو آهي، اميد آهي ته هلندڙ مهيني ئي ڪنسلٽنٽس مقرر ٿي ويندا. وزيراعظم چيو ته انفارميشن ٽيڪنالاجي جي حوالي سان پڻ اجلاس ٿي چڪو آهي. انفارميشن ٽيڪنالاجي جي شعبي ۾ ترقي جي تمام گهڻي گنجائش آهي. آءِ ٽي جي شعبي ۾ ترقي جي حوالي سان حڪمت عملي جوڙي ويندي. وزيراعظم چيو ته پي آءِ اي سميت خساري ۾ هلندڙ ادارن جي نجڪاري جي حوالي سان جيڪي قدم کنيا ويا آهن انهن تي عملدرآمد ٿيندو، اميد آهي ته پي آءِ اي جي نجڪاري جو جيڪو شيڊيول طئي ڪيو ويو آهي ان تي عملدرآمد ٿيندو. ان کانسواءِ ايئرپورٽس جي آئوٽ سورسنگ جي حوالي سان فيصلا ڪيا ويا آهن ان سلسلي ۾ ترڪيه جي هڪ ڪمپني جا عملدار 6 تاريخ تي پاڪستان پهچي رهيا آهن. دفاع واري وفاقي وزير خواجه آصف ۽ مون سان انهن جون ملاقاتون ٿينديون. انهن کي پاڪستان ۾ ان حوالي سان موجود صلاحيت ۽ موقعن بابت آگاهه ڪيو ويندو. اسان اهو طئي ڪيو آهي ته غيرملڪي سيڙپڪارن کي هتي گهرايو ويندو ۽ جيڪي نه اچي سگهندا بعد ۾ عيد کانپوءِ اسان جي ٽيم انهن سان ملاقاتون اتي وڃي ڪندي. وزيراعظم چيو ته آئوٽ سورسنگ جي حوالي سان رڳو اسلام آباد ايئرپورٽ کي غور هيٺ آندو ويو آهي. لاهور ايئرپورٽ تي سهولتون تمام محدود ٿي ويون آهن ۽ مسافرن کي تمام گهڻي پريشاني ٿئي ٿي. ڪراچي ايئرپورٽ جي حوالي سان پڻ اجلاس طلب ڪيو ويندو ۽ قدمن تي غور ڪيو ويندو. وزيراعظم چيو ته چيني سفير سان گڏ هن داسو جو دورو ڪيو. چيني انجنيئرز ۽ ڪارڪنن سان منهنجي ملاقات ٿي انهن کي تسلي ڏني، چيني وفد جي گهرو وزير ۽ پرڏيهي وزير سان پڻ ملاقات ٿي آهي. مارجي ويلن جا مڙهه ايئرفورس جي جهاز جي ذريعي چين پهچايا ويا. صوبن سان گڏجي چيني انجنيئرز ۽ ڪارڪنن جي سيڪيورٽي کي فول پروف بڻايو ويندو.
