اسلام آباد۔30ستمبر (اے پی پی):وزیراعظم عمران خان ہدایت کیتی اے جو قبضے آلی زمین کوں چھڑاوݨ کیتے قانون دا سختی نال نفاذ یقینی بݨایا ونڄے، اے ہدایت انہاں خمیس کوں قومی رابطہ کمیٹی ہاؤسنگ و تعمیرات دے اجلاس دی صدارت کریندے ہوئیں ݙتی اجلاس اچ وزیرِ مملکت اطلاعات و نشریات فرخ حبیب، معاونِ خصوصی ڈاکٹر شہباز گِل اتے متعلقہ اعلیٰ افسران شرکت کیتی۔ وزیراعظم اجلاس اچ ڳال کریندے ہوئیں آکھیے جو حکومت ماحولیاتی تحفظ کیتے جنگلات دی زمیناں دی حفاظت کوں یقینی بݨیندی پئی اے انہاں آکھیے جو فوڈ سکیورٹی اتے موسمیاتی تبدیلی ایں ویلھے بشمول پاکستان دنیا اچ ساریں توں اہم مسئلہ اے ، وزیراعظم آکھیے جو حکومت قبضہ شدہ زمین کوں چھڑاوݨ کیتے اقدامات کریندی پئی اے ، کیڈسٹرل میپنگ توں ڈیڈ کیپٹل دی نشاندہی تے ایندا بہتر استعمال ممکن تھی سڳسی ۔اجلاس کوں چیئرمین سی ڈی اے اسلام آباد اچ جاری ترقیاتی منصوبیں دے حوالے نال بریفنگ ݙتی ۔ انہاں ݙسائے جو سیکٹر I-15 دی تکمیل ھک سال دی گھٹ مدت اچ یقینی بݨائی ڳئی اے ، نواں پاکستان ہاؤسنگ دے تحت فراش ٹاؤن اتے ٻئے انفراسٹرکچر دے منصوبے وی وختی پورے کر ڳھدے ویسن ۔ اجلاس کوں سروئیر جنرل دی طرفوں کیڈسٹرل میپنگ تے وی تفصیلی بریفنگ ݙتی ڳئی۔ چیئرمین سی ڈی اے ݙسائے جو اسلام آباد تے لاہور سودھے پورے ملک اچ ڈیجیٹل میپنگ اتے سرکاری زمیناں دی نشاندہی تے تکھا کم جاری اے ۔
