اسلام آباد – 31 – آڪٽوبر (اي پي پي) نگران وزيراعظم انوارالحق ڪاڪڙ چين پاڪستان اقتصادي لنگهه کي ”صدي ۾ هڪ ڀيرو ايندڙ موقعو“ قرار ڏيندي چيو آهي ته پاڪستان تيز رفتار اقتصادي ۽ صنعتي ترقي حاصل ڪرڻ جي لاءِ سي پيڪ منصوبي جي ٻئي مرحلي تي ڌيان ڏئي رهيو آهي، سي پيڪ منصوبن سان منفرد موقعا ۽ تبديلي رڳو پاڪستان تائين محدود نه رهندي پر اتر ڏکڻ رستن ۽ ريل ۽ روڊ نيٽ ورڪس جي ترقي سان گڏ خطي تائين توسيع ملندي، امن جي لاءِ مسلسل ڪوششن جي باوجود پاڪستان کي ڀارت پاران تمام گهڻا ڏکيا چئلينجز درپيش آهن، غزه ۾ فوري جنگبندي ڪئي وڃي ۽ ناقابل قبول تشدد کي جنگي ڏوهه طور سمجهيو وڃي. نشر ٿيندڙ چين جي فينڪس ٽي وي کي ڏنل انٽرويو ۾ نگران وزيراعظم چيو ته چين جي بيلٽ اينڊ روڊ انيشي ايٽو تحت شروع ٿيندڙ سي پيڪ پاڪستان جي مختلف شعبن ۾ نمايان ترقي ۾ مدد فراهم ڪئي آهي. هن چيو ته چين جي ارومچي ۽ پاڪستان جي اتر گلگت بلتستان ۾ خاص طور تي واپار ۽ سياحت ۾ تعاون جا وسيع امڪان موجود آهن، پاڪستان ٻنهي ملڪن جي وچ ۾ وڏي اقتصادي سرگرمين ۽ سياحن جي اچڻ جي اميد ڪري رهيو آهي جنهن سان ماڻهن جي سماجي ۽ اقتصادي زندگي ۾ بهتري ايندي، ارومچي سرزمين چين تائين پهچ جي لاءِ اسان جي لاءِ گيٽ وي بڻجي سگهي ٿو، اهو پاڪستان ۽ چين ٻنهي جي مفاد ۾ آهي. ان کانسواءِ هن پٺتي پيل صوبي بلوچستان ۾ سي پيڪ منصوبن جي ذريعي گهڻ رخي ترقي جي حوالي سان اڳڀرائي جو ذڪر ڪيو. بي آر آءِ جي اهميت کي اجاگر ڪندي هن چيو ته منفرد موقعا ۽ تبديلي رڳو پاڪستان تائين محدود نه رهندي پر اتر ڏکڻ رستن ۽ ريل ۽ روڊ نيٽ ورڪس جي ترقي سان گڏ خطي تائين توسيع ملندي، اهو دنيا ۾ چين جي اقتصادي ۽ سياسي اثررسوخ کي وڌائڻ جو سبب بڻجندو. هن چيو ته چين جي پنهنجي دوري دوران کيس چين جي متاثر ڪندڙ ترقي جي سفر جادو ڪري ڇڏيو، ان تاثر مون کي پاڪ چين دوستي جو سڀ کان وڏو سفير بڻائي ڇڏيو آهي. چين کي ٽن لفظن ۾ بيان ڪرڻ جي سوال تي هن چيو ته ”باوقار، وڏو ۽ خوداعتماد“. پاڪ چين لاڳاپن جي حوالي سان هن ان کي ”ويجهي ترين، جيتوڻيڪ ٻه مختلف ملڪ آهن پر هڪ قوم هڪ ئي رخ ۾ اڳتي وڌي رهي آهي، موسمياتي تبديلين کي منهن ڏيڻ جي لاءِ گرين انرجي ۾ چين سان تعاون تي هن روشني وڌي ته پاڪستان قدرتي آفتن جي سڀ کان وڌيڪ متاثر ملڪن مان هڪ آهي ۽ دنيا ۽ چين جي مختلف گهڻ رخي فورمز تائين وٺي ويندو، موسمياتي تبديلي اسان جي پاليسين جو تعين ڪندي ته اها ملڪ ۽ خطي جي لاءِ خطرناڪ آهي، اسان اڪيلائپ ۾ جواب نه ٿا ڏئي سگهون. چين جي عروج کي ڪجهه ملڪن پاران هڪ خطري طور ڏسڻ بابت هن چيو ته زمين تي ڪا به طاقت اڀرندڙ قوت کي ختم نه ٿي ڪري سگهي، ان کي منهن ڏيڻ جو صحيح طريقو چين سان تعاون ڪرڻ آهي نه وري ان تي ضابطو آڻڻ آهي. آمريڪا سان لاڳاپن بابت نگران وزيراعظم چيو ته سيڪيورٽي ۽ دهشتگردي جي خاتمي جي شعبن ۾ تعاون جاري آهي ڇو ته پاڪستان دهشتگردي ۽ انتهاپسندي سان وڙهڻ جي لاءِ پرعزم آهي. ڀارت سان لاڳاپن ۾ بهتري جي امڪانن بابت پڇڻ تي هن چيو ته امن جي لاءِ مسلسل ڪوششن جي باوجود پاڪستان کي ڀارت پاران ڏکيا چئلينجز درپيش آهن، ائين لڳي ٿو ته امن ڀارت پاران هڪ مبهم خيال آهي. هن چيو ته پاڪستان ڀارت سان لاڳاپن ۾ بهتري جو ڪو موقعو هٿان وڃڻ نه ڏيندو جڏهن ته هن زور ڏئي چيو ته ڀارت جي غيرقانوني قبضي هيٺ ڄمون ۽ ڪشمير جي مسئلي جي حل کانسواءِ ڳالهه ٻولهه يا معمول جي واپاري سرگرمي ناقابل تصور آهي. ڄمون ۽ ڪشمير جي مسئلي جي حل ۾ عالمي برادري جي ڪردار تي هن چيو ته دنيا کي پنهنجي مفادن بدران اخلاقي اصولن کي ترجيح ڏيڻ جي ضرورت آهي. غزه جي صورتحال تي سوال تي هن فوري جنگبندي جو مطالبو ڪيو ۽ چيو ته بلڪل ناقابل قبول تشدد کي جنگي ڏوهه طور سمجهيو وڃي. هن خوراڪ ۽ دوائن سميت ضرورت جي شين جي فراهمي کي يقيني بڻائڻ جي لاءِ غزه تائين انساني امداد جي لاءِ بنا رڪاوٽ جي لنگهه قائم ڪرڻ تي زور ڏنو.
