اسلام آباد-07 فيبروري (اي پي پي) اليڪشن ڪميشن سيڪريٽريٽ ووٽن جي ٻيهر ڳڻپ جي درخواستن جي وصوليءَ لاءِ ڇنڇر ۽ آچر ڏينهن کُليل رهندي. اميدوارن ۽ عوام لاءِ ٻيهر ڳڻپ جي حوالي سان درخواستون جمع ڪرائڻ لاءِ ضروري ايس او پيز به جاري ڪيون ويون آهن. اليڪشن ڪميشن طرفان جاري پڌرائيءَ مطابق عوام کي آگاهه ڪيو وڃي ٿو ته اليڪشن ڪميشن سيڪريٽريٽ 10 ۽ 11 فيبروريءَ تي کُليل رهندي ۽ ووٽن جي ٻيهر ڳڻپ بابت درخواستون ڏيندڙن/اميدوارن تحت اليڪشنز ايڪٽ 2017ع جي شق 95 آفيس وقت صبح 8:30 وڳي کان شام 4:30 وڳي تائين وصول ڪيون وينديون. وڌيڪ درخواستن تي اليڪشن ڪميشن ۾ ٻُڌڻي 10 ۽ 11 فيبروريءَ تي ٿيندي. پٽيشن جمع ڪرائڻ لاءِ ضروري هدايتون ايس او پيز اليڪشن ڪميشن جي ويب سائٽ تي اپ لوڊ ڪيون ويون آهن، ان ڪري ايس او پيز مطابق پنهنجون درخواستون جمع ڪرايون وڃن. ايس او پيز جي نقطن مطابق پٽيشنز جو ڪاپيون (هڪ اصل ۽ 8 ڪاپيون) مڪمل تفصيل سان جمع ڪرائڻيون پونديون. جنهن تي داخل ڪرڻ جي تاريخ هوندي. درخواست ڏيندڙ درخواست جي سافٽ ڪاپي (پي ڊي ايف) ۾ مهيا ڪندو ۽ گڏ ئي جيڪي به ان وٽ ثبوت هوندا اهي به يو ايس بي ۾ ڏيندو ۽ درخواست سان ڳنڍيندو. درخواست ڏيندڙ پنهنجي شناختي ڪارڊ جي ڪاپي درخواست سان لڳائيندو ۽ پنهنجي درست ائڊريس ۽ رابطو نمبر لکندو. جيڪڏهن ڪنهن وڪيل ذريعي درخواست داخل ڪئي پئي وڃي ته درخواست سان گڏ وڪالت نامو لڳل هجي. وڪيل جو ڪارڊ ۽ ٻيو رابطو نمبر موجود هجي. سڀ درخواستون باقائده انڊيڪس، صفحن جي نمبرنگ ۽ فليڪٽڪ هجن. صرف مقرر تاريخ ۽ وقت تي وصول ٿيل درخواستون اليڪشن ڪميشن سامهون ٻڌڻي لاءِ مقرر ٿينديون.
